Free Belarus Center запускае Акселератар адвакацыйных праектаў і запрашае беларускіх актывістаў_ак — як тых, хто знаходзіцца ў РБ, так і тых, хто пакінуў краіну — прыняць удзел у 3-х месячнай праграме. Удзельнікі_цы будуць працаваць над ідэямі грамадскіх кампаній, атрымаюць новыя веды і навыкі ад спецыялістаў па адвакацыі, а таксама атрымаюць магчымасць фінансавай падтрымкі праектаў, якія датычацца дасягнення пазітыўных змен у грамадскай сферы.
Адвакацыя (Advocacy) — гэта рэгулярная дзейнасць ці кампанія, накіраваная на прасоўванне і абарону правоў і інтарэсаў пэўнай сацыяльнай групы ці тэмы праз змену палітык, законаў і практык у органах улады, устанавах ці паміж групамі ўплыву. Прасцей кажучы — гэта працэс, калі вы спрабуеце пераканаць іншых людзей падтрымаць вашу пазіцыю ці пункт гледжання, але толькі на высокім узроўні. Напрыклад, прыняць закон ці змяніць практыку прымянення.
Хто можа ўдзельнічаць:
Незалежныя беларускія актывісты, прадстаўнікі грамадскіх арганізацый і тыя, у каго ёсць ідэі грамадска важных кампаній і ініцыятыў, якія часова ці стала жывуць у Польшчы, Літве, Грузіі, Украіне, Германіі і, вядома ж, у Беларусі. Вопыт арганізацыі і ўдзелу ў адвакацыйных кампаніях вітаецца. Заяўка на ўдзел павінна ўключаць апісанне праблемы, над якой вы плануеце працаваць.
Прыярытэтныя тэмы праектаў:
— пытанні міграцыйнай палітыкі ў краінах пражывання;
— гуманітарны крызіс;
— барацьба з дыскрымінацыяй;
— гістарычная памяць;
— таксама могуць быць разгледжаны іншыя тэмы праектаў.
Падчас Акселератара вы зможаце даведацца:
— што ж азначае «адвакацыя»;
— якія бываюць віды адвакацыі;
— пра этапы, інструменты і тактыкі адвакацыйнай кампаніі;
— як выбудоўваць камунікацыйную стратэгію;
— а таксама вы зможаце падчас афлайн сесіі наведаць профільныя дзяржаўныя ўстановы і арганізацыі.
Акселератар стартуе з афлайн трэнінг-праграмы 12-14 верасня ў адной з краін ЕЗ, у сувязі з чым ва ўдзельнікаў пажадана наяўнасць дзеючай візы для наведвання краін Еўразвяза, арганізатары не гарантуюць магчымасць атрымання візы. Лакацыя будзе паведамлена дадаткова (транспартныя выдаткі, а таксама выдаткі на пражыванне і харчаванне пакрываюць арганізатары).
Акселератар будзе складацца з наступных этапаў:
— выязны 3-дзённы трэнінг з наведваннем профільных дзяржаўных устаноў і арганізацый (афлайн)
— ментарства (анлайн)
— фінальны пітчынг праектаў (анлайн)
— лепшыя праекты атрымаюць міні-гранты
Пад час акселератара ўдзельнікам_цам будуць дапамагаць беларускія і міжнародныя ментары_кі:
🔹Крысціна Рыхтэр — юрыстка, праваабаронца. Юрыстка Офіса Святланы Ціханоўскай, удзельніца працоўнай групы па пытаннях міграцыі пры МУС Польшчы. Каардынатарка Школы кампейнера Petitions.by. Заснавальніца і ex-дырэктарка NGO Youth labour rights.
🔹Андрэй Сушко — аўтар даследаванняў і дапаможнікаў па доступе да інфармацыі дзяржаўнага сектара, электроннага ўрада, расследаванню злачынстваў у Інтэрнеце.
Працаваў у Беларускім Хельсінскім камітэце, цэнтры прававой трансфармацыі «Lawtrend». Зараз з’яўляецца сузаснавальнікам праваабарончай арганізацыі Human Constanta.
Працуе з Амерыканскай асацыяцыяй юрыстаў як знешні эксперт па Цэнтральнай Азіі, быў адным і ментараў «Хакатона лічбавага грамадзянства» — праекта інкубатара GovTech і CivicTech у Казахстане.
🔹Віталь Шкляроў — доктар навук, былы навуковы супрацоўнік Гарвардскага ўніверсітэта, аглядальнік і эксперт па амерыкана-еўрапейскіх адносінах, палітычны стратэг і нізавы актывіст. Быў старэйшым дарадцам многіх апазіцыйных кандыдатаў у прэзідэнты ў ЗША, Германіі, Расіі, Грузіі, Беларусі і Украіне. Пражываючы ў Вашынгтоне, Віталь працаваў у прэзідэнцкіх кампаніях Барака Абамы і Берні Сандэрса.
Дзякуючы серыі афлайн і анлайн сустрэч з экспертамі_камі з розных краін удзельнікі_цы бліжэй пазнаёмяцца з паспяховымі кейсамі адвакацыйных кампаній і рызыкамі, якія могуць узнікнуць падчас адвакацыі.
Па выніках праграмы акселератара пасля праходжання афлайн-трэнінгу, дапрацоўкі праектаў і пітчынгу ідэй удзельнікі_цы могуць прэтэндаваць на фінансавую падтрымку ў памеры ад 500 да 2000 USD.
Пачатак праграмы — 12 верасня.
Дэдлайн падачы: 19 жніўня ў 23:59.